“Ertaklar olami” deb nomlangan orol haqida eshitganmisiz ?
- Batafsil
- Nashrlangan: Seshanba, 11 Dekabr 2018, 10:28
Bugungi kunda mamlakatimizning turizm salohiyati yildan yilga ortib borayotgani hech kimga sir emas. Buni har yili yurtimizga tashrif buyurayotgan sayyohlar sonini ortayotganidan ham bilish mumkin. Sayyohlar sonini ortishiga sabab boʻladigan eng asosiy omillar deganda: sifatli xizmat turlarini taklif etish va yangi sayyohlik maskanlarini yaratishni misol keltirishimiz mumkin.
Joriy yil davomida Oʻzbekiston Respublikasi Turizmni Rivojlantirish Davlat Qoʻmitasi tomonidan ushbu sohada oʻzining tadbirkorlik faoliyatini boshlamoqchi boʻlgan fuqarolarga yaratilayotgan yengilliklar haqida targʻibot-tashviqot ishlari amalga oshirilib kelindi. Fuqarolarimiz ham oʻz navbatida yaratilayotgan keng imkoniyatlardan samarali foydalanib, yurtimiz iqtisodiyotiga ozmi-koʻpmi oʻz hissalarini qoʻshishga harakat qilmoqdalar.
Samarqand viloyati Ishtixon tumani Ohunboboyev jamoa xoʻjaligi Qorahoni qishlogʻida yangi ekomaskan bunyod etildi. Bundan koʻzlangan maqsad aholini yurtimiz boʻylab sayohat qilishga jalb etish va ichki turizmni rivojlantirish va Chet ellik sayyohlar uchun yangi ekomaskanlar yaratishdir. Yangi “Ertaklar olami” deb nomlangan yangi orol joriy yilda oʻz faoliyatini boshladi.
Ekomaskan tashrif buyuruvchilar uchun oʻzgacha bir muhitni oʻzida aks ettirgan boʻlib, barcha sayyohlarni oʻzining gʻaroyibotlarga boy olamiga jalb qila oladi.
Bu yerga tashrif buyuradigan sayyohlar oʻz qoʻllari bilan baliqlarni ovlab, oʻzlari xohlagan taomlarini tayyorlashlari mumkin.
Shu bilan birga, ushbu maskanda ekoturizm va agroturizm yoʻnalishlari boʻyicha madaniy hordiq olish imkoniyatlari ham mavjud. Mazkur dam olish joyi bir vaqtning oʻzida 80 nafar dam oluvchilarni qabul qilish imkoniyatiga ega.
Bu maskan mahalliy va xorijiy sayyohlarga mavsumiy emas balki yilning barcha faslida sifatli xizmat koʻrsata oladi.
Тurizmni rivojlantirish davlat qo`mitasi matbuot xizmati